மத்திய கல்லூரிகளுக்கான சிநேகபூர்வ ஆட்டம் 18 வயதுப் பிரிவில் நெல்லியடி மத்திய கல்லூரி அணி வெற்றி
நெல்லியடி மத்திய கல்லூரியின் லண்டன் பழைய மாணவர் கிளையினரால் நெல்லியடி மத்திய கல்லூரியின் உதைபந்தாட்டத்தை வளர்க்கும் நோக்கில் 18 வயதுப் பிரிவினருக்கான நெல்லியடி மத்திய கல்லூரி மற்றும் யாழ் மத்திய கல்லூரி அணிக்கும் இடையிலான கால்பந்தாட்ட தொடரில் நெல்லியடி மத்திய கல்லூரி அணி வெற்றி பெற்றது.
நெல்லியடி மத்திய கல்லூரி லண்டன் கிளை பழைய மாணவர் சங்கத்தின் ஏற்பாட்டில் நடாத்தப்பட்ட 18 வயதிற்கு உட்பட்ட ஆண்களுக்கான கால்பந்தாட்ட போட்டியில் நெல்லியடி மத்திய கல்லூரி அணியை எதிர்த்து யாழ் மத்திய கல்லூரி அணி மோதியது.
முதல் பாதியாட்டத்தில் இரு அணிகளும் ஒன்றுக்கொன்று சளைத்தவர்கள் அல்ல என்பதை நிரூபிக்கும் வகையில் விளையாடிக் கொண்டிருந்தனர் இதனால் முதல் பாதியாட்டத்தில் இரு அணிகளாலும் கோல் எதனையும் பதிவு செய்ய முடியவில்லை.
இரண்டாவது பாதியாட்டம் இரு அணிகளுக்கும் சவாலாக அமைந்தது. இருப்பினும் ஆட்டம் முடிவடைவதற்கு சில நிமிடங்கள் இருக்கும் போது நெல்லியடி மத்திய கல்லூரி அணி வீரர் கெளசிகன் ஒரு கோலைப் பதிவு செய்ய ஆட்ட நேர முடிவில் நெல்லியடி மத்திய கல்லூரி 1:0 என்ற கோல் கணக்கில் வெற்றி பெற்றது.
